मदन भण्डारीको ७५औँ जन्मजयन्तीका अवसरमा काठमाडौंमा आयोजित विचार गोष्ठीले राजनीतिक वृत्तमा विशेष चर्चा पाएको छ। मदन भण्डारी फाउन्डेसनको आयोजनामा राष्ट्रिय सभागृहमा भएको कार्यक्रममा चार पूर्वप्रधानमन्त्री एकै मञ्चमा देखिएपछि वाम राजनीति फेरि नयाँ मोडमा जान लागेको हो कि भन्ने बहस सुरु भएको छ।
कार्यक्रममा एमाले अध्यक्ष तथा पूर्वप्रधानमन्त्री केपी शर्मा ओली, नेकपाका संयोजक पुष्पकमल दाहाल ‘प्रचण्ड’, सह–संयोजक माधवकुमार नेपाल र वरिष्ठ नेता झलनाथ खनाल सहभागी भए। पूर्वराष्ट्रपति विद्यादेवी भण्डारीको उपस्थितिले पनि कार्यक्रमलाई थप महत्व दिएको देखियो।
यो भेट केवल औपचारिक समारोहमा सीमित रहने कि आगामी राजनीतिक सहकार्यको संकेत बन्ने भन्ने विषयलाई धेरैले चासोका साथ हेरेका छन्। पछिल्ला केही दिनयता वाम शक्तिबीच संवाद र सहकार्यको चर्चा बढिरहेका बेला यी शीर्ष नेताहरू एउटै मञ्चमा उभिनुलाई अर्थपूर्ण रूपमा विश्लेषण गरिएको छ।
यसअघि विराटनगरमा आयोजित कार्यक्रममा प्रचण्डले एमालेसँग संसद र सडक दुवै मोर्चामा सहकार्य गरेर अघि बढ्ने वातावरण बनेको बताएका थिए। तत्काल पार्टी एकता सम्भव नभए पनि साझा मुद्दामा सहकार्य गर्ने समझदारी विकास भएको उनको भनाइ थियो।
त्यसक्रममा उनले आफ्नो राजनीतिक जीवनमा पटक–पटक ‘क्रमभंग’ गर्दै आएको स्मरण गराउँदै आगामी महाधिवेशनबाट फेरि नयाँ राजनीतिक मोड आउने संकेत दिएका थिए। त्यसलाई उनले आफ्नो राजनीतिक यात्राको ‘अन्तिम क्रमभंग’ का रूपमा प्रस्तुत गर्दै पार्टीका नेता–कार्यकर्तालाई त्यसका लागि तयार रहन आग्रह गरेका थिए।
आजको अभिव्यक्तिमा सबैको नजर
यही पृष्ठभूमिका कारण मदन भण्डारीको जन्मजयन्ती कार्यक्रममा सहभागी शीर्ष नेताहरूले दिने धारणा र उनीहरूबीच देखिने राजनीतिक सन्देशलाई विशेष महत्वका साथ हेरिएको छ। वाम शक्तिबीच सहकार्यको सम्भावना कति अघि बढ्छ भन्ने संकेत खोज्न राजनीतिक वृत्त मात्र होइन, सर्वसाधारणको पनि ध्यान आजको कार्यक्रमतर्फ केन्द्रित भएको छ।
