संसदमा हर्कको कटाक्ष– ‘म पनि एकछिन निदाउँछु’
प्रतिनिधिसभा सदस्य तथा श्रम संस्कृति पार्टीका अध्यक्ष हर्क साम्पाङले संसद् बैठकमै मन्त्री महावीर पुनलाई लक्षित गर्दै व्यंग्य गरेका छन्। केही दिनअघि राष्ट्रियसभाको बैठकमा पुन निदाएको दृश्य सामाजिक सञ्जालमा भाइरल भएको प्रसंग निकाल्दै साम्पाङले आफूलाई पनि ‘निदाउने सुविधा’ चाहिएको टिप्पणी गरेका हुन्।
प्रतिनिधिसभाको बैठकमा बोल्ने क्रममा साम्पाङले भने, “यहाँ पनि निदाउने सुविधा भए जानकारी होस्, म पनि एकछिन निदाउनुपर्यो।”
उनको यो टिप्पणीसँगै संसद्मा केही दिनदेखि चर्चामा रहेको मन्त्री पुनको प्रसंग फेरि जोडिएको छ। राष्ट्रियसभाको बैठकका क्रममा पुन निदाएको जस्तो देखिने दृश्य सार्वजनिक भएपछि त्यसले सामाजिक सञ्जालमा चर्चा पाएको थियो।
त्यही घटनालाई संकेत गर्दै साम्पाङले प्रतिनिधिसभामा आफ्नो पालोमा व्यंग्यात्मक अभिव्यक्ति दिएका हुन्।
साम्पाङ आफ्ना सिधा, खरो र बेलाबेला व्यंग्यात्मक अभिव्यक्तिका कारण चर्चामा रहने गरेका छन्। श्रम संस्कृति पार्टीको नेतृत्व गर्दै प्रतिनिधिसभामा पुगेका उनले संसदीय मञ्चमा पनि आफ्नो परिचित अभिव्यक्ति शैली देखाएका छन्।
राष्ट्रियसभामा पुनको उक्त दृश्य सार्वजनिक भएपछि सामाजिक सञ्जालमा फरक–फरक प्रतिक्रिया आएका थिए। कतिपयले मन्त्रीको संसदीय उपस्थितिलाई लिएर प्रश्न उठाएका थिए भने कतिपयले बैठकको एउटा क्षणको दृश्यलाई आधार बनाएर निष्कर्ष निकाल्न नहुने बताएका थिए।
यसबीच साम्पाङले प्रतिनिधिसभाबाटै गरेको कटाक्षले मन्त्री पुनको ‘निदाएको’ प्रसंगलाई पुनः चर्चामा ल्याएको छ।
