रुसी मिसाइल आक्रमणमा किभमा पाँच जनाको मृत्यु
युक्रेनको राजधानी किभ र आसपासका क्षेत्रमा रातभर भएका रुसी मिसाइल आक्रमणले फेरि जनधनको क्षति पुर्याएको छ। आवासीय क्षेत्रदेखि औद्योगिक संरचनासम्म प्रभावित भएको आक्रमणमा कम्तीमा पाँच जनाको मृत्यु भएको छ भने २३ जना घाइते भएका छन्।
युक्रेनको राज्य आपत्कालीन सेवाका अनुसार आक्रमणपछि विभिन्न स्थानमा भवन भत्किएका छन्। उद्धार टोलीहरू रातभर भग्नावशेष हटाउँदै त्यहाँ फसेका मानिसको खोजीमा जुटेका थिए। भग्नावशेषमा पुरिएका एक व्यक्तिलाई जीवितै निकालिएको अधिकारीहरूले जनाएका छन्।
आक्रमणबाट आवासीय भवन र गोदाममा क्षति पुगेको छ। केही स्थानमा उद्धार तथा खोजी कार्य जारी रहेकाले क्षतिको पूर्ण विवरण आउन बाँकी छ।
किभका मेयर भिताली क्लित्स्कोका अनुसार रातिको आक्रमणबाट एउटा बालबालिका अस्पतालसमेत प्रभावित भएको छ। विस्फोटको असरले अस्पतालका झ्यालका सिसा फुटेका छन् भने आसपास पार्क गरिएका गाडीमा आगो लागेको छ।
राजधानीको दक्षिण–पश्चिममा पर्ने सोलोम्यान्स्की जिल्लाको एक औद्योगिक केन्द्रमा पनि मिसाइल प्रहार भएको मेयर क्लित्स्कोले बताएका छन्।
किभ क्षेत्रकै ब्रोभरी जिल्लामा भएको अर्को आक्रमणमा एक पुरुषको मृत्यु भएको छ। अर्का एक व्यक्ति घाइते भएको क्षेत्रीय गभर्नर तिमुर त्काचेन्कोले जानकारी दिएका छन्।
आक्रमणअघि नै बजेको थियो हवाई खतराको चेतावनी
राति आक्रमण सुरु हुनुअघि क्षेत्रीय प्रशासनले सर्वसाधारणलाई सुरक्षित स्थानमा जान आग्रह गरेको थियो। सम्भावित मिसाइल आक्रमणसँगै हवाई प्रतिरक्षा प्रणाली सक्रिय हुन सक्ने भन्दै नागरिकलाई आश्रयस्थलमा बस्न चेतावनी दिइएको थियो।
युक्रेनी वायुसेनाबाट प्राप्त चेतावनीका आधारमा अधिकारीहरूले थप मिसाइल प्रहार हुन सक्ने जोखिमसमेत औँल्याएका छन्।
रुसी आक्रमणको असर विद्युत् आपूर्तिमा पनि परेको छ। रातभर हजारौँ घरमा बिजुली अवरुद्ध हुँदा किभ क्षेत्रका केही भाग अन्धकारमा डुबेका थिए। क्षति पुगेका ऊर्जा संरचना मर्मत गरी आपूर्ति पुनः सञ्चालन गर्न प्राविधिक टोली परिचालन गरिएको छ।
आक्रमणको जोखिम बढेपछि छिमेकी पोल्यान्डले पनि सावधानीस्वरूप सैन्य विमान परिचालन गरेको छ।
लगातार निशानामा किभ
किभले पछिल्ला साताहरूमा लगभग हरेक रातजसो हवाई आक्रमणको सामना गरिरहेको छ। कतिपय आक्रमणमा ठूलो मानवीय क्षति भएको छ भने नागरिक पूर्वाधार र आवासीय क्षेत्र पनि लगातार प्रभावित भइरहेका छन्।
युद्धको प्रभाव युक्रेनभित्र मात्रै सीमित छैन। युक्रेनी मिसाइल र ड्रोन आक्रमणको सामना रुसले पनि गरिरहेको छ। यसै साता रुसमा भएका दुई फरक आक्रमणमा एक बालकसहित कम्तीमा १६ जनाको मृत्यु भएको विवरण आएको छ।
एकअर्काको भूभागमा भइरहेका यस्ता आक्रमणबीच युद्ध अन्त्यका लागि वार्ताको दबाब पनि बढिरहेको छ। तर राजधानी र नागरिक बस्तीमाथि दोहोरिइरहेका आक्रमणले तत्काल तनाव कम हुने संकेत देखाएको छैन।
रुसले फेब्रुअरी २०२२ मा युक्रेनमाथि पूर्णस्तरको सैन्य आक्रमण सुरु गरेको थियो। त्यसयता जारी युद्ध साढे चार वर्षतर्फ पुग्दा दुवैतर्फ मानवीय क्षति बढिरहेको छ र सर्वसाधारणको दैनिकी निरन्तर प्रभावित बनेको छ।
