काठमाडौँ — ऊर्जा मन्त्री कुलमान घिसिङले आइतबार राति काठमाडौँका मेयर बालेन शाहसँगको तस्बिर सार्वजनिक गरेपछि मुलुकको राजनीतिक वृत्त एकाएक बनिरहेको छ। फेसबुकमा राखिएको उक्त तस्बिरसँगै उनले लेखेका शब्द, “देश निर्माणको यात्रामा हामी एकसाथ छौँ,” ले झनै चासो बढाएको छ।
तस्बिर बाहिरिएसँगै दुवै व्यक्तिहरूबीच नयाँ राजनीतिक साझेदारी बन्ने हो कि भन्ने चर्चा तीव्र बनेको छ। बालेनले घिसिङले खोलेको ‘उज्यालो नेपाल’ पार्टीसँग हात मिलाउने संकेत त आएको त होइन भन्ने सवाल राजनीतिक दलहरूमाझ घुम्न थालेको छ।
रोचक कुरा के भने, कुलमानले तस्बिर सार्वजनिक गर्ने समय पनि विशेष मानिएको छ। त्यही दिन दिउँसो रास्वपा–विवेकशील साझाको एकता घोषणा भएको थियो, जसपछि बदलिएको राजनीतिक समीकरणमा बालेन र कुलमानलाई एक ठाउँ ल्याउने प्रयास विभिन्न दलहरूले गरिरहेका थिए।
भदौ २३–२४ को जेनजी आन्दोलनपछि उदाएको नयाँ राजनीतिक वातावरणमा यी दुवै व्यक्तिलाई रास्वपा र विवेकशील साझाले बारम्बार सहकार्यका लागि प्रस्ताव गरेको स्रोतहरू बताउँदै आएका छन्। विवेकशील साझाले बालेनसँग गठबन्धन गरेर आगामी फागुन २१ को चुनावमा जाने तयारी गरेको थियो। तर बारम्बारको छलफलले पनि ठोस निष्कर्ष निक्लिन सकेन।
यसैबीच, रास्वपाले पनि घिसिङ–बालेन जोडीलाई आगामी चुनावी मोर्चाका लागि आफ्नै ढङ्गले आकर्षित गर्न खोजिरहेको देखिन्छ। त्यसो त, रास्वपाबाट बाहिरिएकी सुमना श्रेष्ठलाई समेत उज्यालो नेपाल पार्टीमा ल्याउने विषयमा बहुपक्षीय छलफल भएका कुरा पनि सार्वजनिक भएका छन्।
स्रोतका अनुसार पछिल्ला दुई महिनामा विभिन्न तहका संवाद चलिरहँदा कुलमान र बालेनबीच पनि नियमित भेटघाट हुँदै आएको थियो। गत शुक्रबार बालेनको घरमा भएको छलफलपछि नै आइतबारको तस्बिर खिचिएको बताइन्छ।घटनाक्रम नजिकबाट हेरेका स्रोतले दुवै नेतृत्वबीच “सहकार्य गर्ने प्रारम्भिक सहमति भइसकेको” उल्लेख गरेका छन्।
तर, सहकार्यको मोडालिटी, भूमिकाको बाँडफाँड र पार्टीगत जिम्मेवारीबारे भने छलफल जारी रहेको जनाइन्छ। स्रोतका अनुसार तस्बिर सार्वजनिक गर्नु दुवै जनाको सहमतिमा गरिएको हो। यद्यपि, बालेनले उज्यालो नेपालमा आधिकारिक भूमिका लिने कि नलिने भन्ने विषय भने अझै टुंगोमा पुगेको छैन।
उज्यालो नेपाल पार्टी दर्ता गरिँदा बालेन–कुलमान दुवैको नाम राख्नेबारे प्रारम्भिक छलफल भए पनि अन्ततः त्यस्तो निर्णय लागू भएन। ऊर्जा मन्त्रीको हैसियतमा रहँदै अध्यक्ष नबन्ने निष्कर्षमा घिसिङ पुगेपछि पार्टी दर्ता केवल उनको नेतृत्वमै गरिएको हो। तर पछिल्ला दिनमा दुई पक्षबीचको संवाद तीव्र बन्दै गएको छ।
घिसिङले मन्त्री पद छाडेर आगामी चुनावी अभियानमा जाने तयारी गरिरहेका छन्, र त्यसै समयमा बालेन पनि सक्रिय रूपमा चुनाव अभियानमा रहने सहमति दुवैबीच भएको बताइन्छ। कुलमानले आइतबार रातिको तस्बिर सार्वजनिक गर्नु यही तयारीतर्फ संकेत गरेको मानिएको छ। यद्यपि, दुवै—कुलमान घिसिङ र बालेन शाह—ले यो सम्भावित सहकार्यबारे औपचारिक रूपमा केही सार्वजनिक गरेका छैनन्। तर
