गिनीको कोनाक्रीमा फोहोरको पहाड भासिँदा ३० जनाको मृत्यु
गिनीको राजधानी कोनाक्रीमा वर्षापछि विशाल फोहोर थुप्रो भासिँदा कम्तीमा ३० जनाको मृत्यु भएको छ। सहरको ‘दार एस सलाम’ क्षेत्रमा रहेको मुख्य ल्यान्डफिल भासिएर आसपासका घर तथा टहराहरू पुरिँदा ठूलो मानवीय क्षति भएको हो।
अधिकारीहरूका अनुसार आइतबार बिहान करिब २ बजेदेखि परेको भारी वर्षासँगै ल्यान्डफिलको माथिल्लो भागबाट पानी र फोहोरको भेल बगेको थियो। त्यसपछि फोहोरको ठूलो थुप्रो अचानक खस्दा नजिकको बस्ती च्यापिएको हो।
दुर्घटनामा कम्तीमा ६ जना गम्भीर घाइते भएका छन्। कैयौँ घर ध्वस्त भएका छन् भने केही सवारीसाधनसमेत फोहोर र भग्नावशेषमुनि पुरिएका छन्।
घटनापछि उद्धार टोली परिचालन गरिएको छ। भग्नावशेष हटाउँदै हराइरहेका तथा पुरिएको आशंका गरिएका मानिसहरूको खोजी भइरहेको छ। घाइतेलाई एम्बुलेन्समार्फत अस्पताल लगिएको छ।
घटनास्थल सहरभरिबाट संकलित फोहोर फालिने कोनाक्रीको प्रमुख खुला डम्पिङ क्षेत्र हो। ठूलो परिमाणमा वर्षौंदेखि थुपारिएको फोहोर र कमजोर व्यवस्थापनबीच लगातार परेको वर्षाले जोखिम थपेको देखिएको छ।
इन्जिनियरिङ बटालियनका सरसफाइ अधिकृत लेफ्टिनेन्ट कर्नेल बाल्ड मामादो बैलोका अनुसार उक्त खुला डम्पिङ साइट आइतबारदेखि स्थायी रूपमा बन्द गर्ने तयारी थियो। स्थानीय प्रशासनले आसपासका बासिन्दालाई क्षेत्र खाली गर्न यसअघि नै सूचना दिएको थियो। तर दुर्घटनाका बेला पनि धेरै परिवार त्यही क्षेत्रमा बसिरहेका थिए।
यो घटनाले कोनाक्रीमा फोहोर व्यवस्थापनसँगै जोखिमयुक्त क्षेत्रमा फैलिएको बस्तीको सुरक्षामाथि गम्भीर प्रश्न उठाएको छ। खोज तथा उद्धार जारी रहेकाले क्षतिको पूर्ण विवरण अझै आउन बाँकी छ।
खनिज स्रोतका हिसाबले गिनी अफ्रिकाको महत्वपूर्ण मुलुक हो। विश्वमै ठूलो बक्साइट भण्डार भएका देशमध्ये पर्ने गिनीमा फलाम, सुन र हिरासमेत प्रशस्त पाइन्छ। तर प्राकृतिक स्रोतको प्रचुरताका बाबजुद देशले गरिबी र कमजोर पूर्वाधारको समस्या झेलिरहेको छ।
विश्व बैंकको तथ्याङ्कअनुसार गिनीको करिब ४३.७ प्रतिशत जनसंख्या राष्ट्रिय गरिबीको रेखामुनि जीवन बिताइरहेको छ।
