नेकपा एमालेको सचिवालय बैठक आज दिउँसो १ बजे बस्दैछ। पार्टीको महाधिवेशन नजिकिँदै गर्दा बस्न लागेको यो बैठकलाई संगठनात्मक पुनर्संरचनाको दृष्टिले निकै अर्थपूर्ण मानिएको छ। बैठकमा मुख्यत: तीन महत्वपूर्ण एजेन्डामाथि छलफल हुने तयारी छ — पदाधिकारीको संख्या, केन्द्रीय कमिटीको आकार र महाधिवेशन प्रतिनिधि मनोनयन।
एमाले नेतृत्व अहिले पदाधिकारी संख्या बढाउने दिशामा अघि बढेको देखिन्छ। अध्यक्ष केपी शर्मा ओली पक्षमा पदका आकांक्षीहरूको संख्या अत्यधिक भएपछि व्यवस्थापन चुनौतीपूर्ण बन्दै गएको भन्दै संख्या विस्तार गर्ने योजना अघि सारिएको हो।
यसअघि दोस्रो राष्ट्रिय महाधिवेशनले पारित गरेको विधानअनुसार पदाधिकारी संख्या १९ बाट घटाएर १५ मा सीमित गरिएको थियो। उक्त व्यवस्थाअनुसार अध्यक्ष १, उपाध्यक्ष ३, महासचिव १, उपमहासचिव ३ र सचिव ७ जना रहने प्रावधान थियो। तर पछिल्लो तयारीअनुसार दुई जना उपाध्यक्ष र दुई जना सचिव थप्ने प्रस्ताव आउन सक्ने एमाले नेताहरूको भनाइ छ। केही नेताहरूले अध्यक्ष ओलीको चाहना अझ बढी पदाधिकारी थप्ने तर्फ रहेको हुन सक्ने संकेतसमेत गरेका छन्।
आजको सचिवालय बैठकमा केन्द्रीय कमिटीको आकार बढाउने विषय पनि उठ्ने सम्भावना छ। पोलिटब्युरो सदस्य महेश बस्नेतले केन्द्रीय कमिटीलाई ३०१ सदस्यीय बनाउने प्रस्ताव आउने संकेत दिएका छन्। हाल पार्टी विधानमा २५१ सदस्यीय केन्द्रीय कमिटीको व्यवस्था छ। यद्यपि दसौँ महाधिवेशनमा ३०१ सदस्यीय कमिटीको अवधारणा अघि बढाइएको थियो, तर व्यवहारमा त्यो कार्यान्वयन हुन सकेन। अहिले एमालेको केन्द्रीय कमिटीमा ३५५ जना सदस्य छन्।
सचिवालय बैठकको अर्को महत्त्वपूर्ण विषय महाधिवेशन प्रतिनिधि मनोनयन हो। विधानअनुसार पार्टीले कुल प्रतिनिधिको ५ प्रतिशत मनोनयन गर्न पाउने व्यवस्था छ। हाल २,१५४ जना प्रतिनिधि निर्वाचन प्रक्रियाबाट छनोट भइसकेका छन्। यदि ५ प्रतिशतअनुसार १०८ जना प्रतिनिधि मनोनयन गरिए भने कुल प्रतिनिधि संख्या २,२६२ पुग्नेछ।
तर पार्टीभित्र सबै पक्ष यो प्रस्तावमा सहमत छैनन्। वरिष्ठ उपाध्यक्ष ईश्वर पोखरेल पक्षले विधान महाधिवेशनले तोकेको पदाधिकारी संख्या र केन्द्रीय कमिटीको संरचना यथावत् राख्नुपर्ने अडान लिँदै आएको छ। यदि आजको बैठकमा पदाधिकारी र कमिटी संख्या बढाउने प्रस्ताव औपचारिक रूपमा आयो भने त्यसको प्रतिवाद गर्ने तयारी उक्त पक्षले गरिसकेको छ।
साथै, उनीहरू नेतृत्वमा दुई कार्यकालको सीमा तोक्नुपर्ने वैकल्पिक प्रस्ताव पनि अघि सार्ने तयारीमा रहेको बताइएको छ। महाधिवेशनको संघारमा बसेको यो बैठकले एमालेको आगामी शक्ति सन्तुलन र संगठनात्मक दिशा कस्तो हुने भन्ने कुरामा महत्वपूर्ण संकेत दिने अपेक्षा गरिएको छ।
