नेकपा एमालेभित्र आन्तरिक असन्तोष फेरि सतहमा आएको छ। पार्टी अध्यक्ष केपी शर्मा ओलीले केही नेताहरूको गतिविधिप्रति खुलेर असन्तुष्टि व्यक्त गर्दै उनीहरू पार्टीको आत्मआलोचनालाई गलत दिशामा लैजान खोजिरहेको संकेत गरेका छन्।
भृकुटीमण्डपमा बसेको केन्द्रीय कमिटी बैठकमा बोल्दै अध्यक्ष ओलीले पार्टीभित्रैबाट बाह्य विचार र एजेन्डा बोकेर हिँड्ने प्रवृत्तिले संगठनलाई कमजोर बनाउने चेतावनी दिए। उनका अनुसार, केही नेताहरूले आत्मआलोचनाको नाममा विपक्षी शक्तिहरूले समेत उठाउन नसकेको विषयलाई पार्टीभित्रै अघि सारेका थिए।
अध्यक्ष ओलीले भदौ २३ र २४ गतेको राजनीतिक घटनाक्रम स्मरण गर्दै भने, तत्कालीन अवस्थामा केही पार्टी नेताहरूले प्रधानमन्त्री मात्र होइन, पार्टी अध्यक्ष पदबाट समेत राजीनामा दिनुपर्ने कुरा उठाएको बताए। यस्तो धारणा विपक्षी दल वा सञ्चारमाध्यमबाट नभई आफ्नै पार्टीभित्रबाट आउनु गम्भीर विषय भएको उनको भनाइ थियो।
यसैबीच, पार्टी नेतृत्व संरचनालाई लिएर पनि एमालेभित्र बहस चर्किएको छ। अध्यक्ष ओलीले पदाधिकारी र केन्द्रीय कमिटीको संख्या विस्तार गर्ने प्रस्ताव ल्याउने तयारी गरेपछि वरिष्ठ उपाध्यक्ष ईश्वर पोखरेल निकट नेताहरूले त्यसको विरोध गर्ने संकेत दिएका छन्।
पार्टीभित्रका स्रोतहरूका अनुसार अध्यक्ष ओलीले पदाधिकारी संख्या १९ पुर्याउने र केन्द्रीय कमिटीलाई ३०१ सदस्यीय बनाउने प्रस्ताव अघि सार्न सक्ने चर्चा छ। तर, गत भदौमा सम्पन्न विधान महाधिवेशनले पार्टी संरचनालाई संक्षिप्त बनाउने निर्णय गरिसकेको अवस्थामा फेरि विस्तार गर्न खोजिनु विवादको कारण बनेको छ।
नेतृत्व व्यवस्थापनको नाममा संरचना फेर्ने प्रयासले पार्टीको संस्थागत विश्वसनीयतामा प्रश्न उठ्न सक्ने भन्दै केही नेताहरू असन्तुष्ट देखिएका छन्। यसले आगामी दिनमा एमालेभित्र नेतृत्व र संगठनात्मक दिशालाई लिएर थप बहस र टकराव निम्त्याउने संकेत देखिएको छ।
