नेकपा एमालेका पोलिटब्युरो सदस्य महेश बस्नेतले नागढुंगा–मलेखु सडक खण्ड बन्द गर्ने सरकारी निर्णयलाई राजनीतिक उद्देश्यसहितको कदम भन्दै कडा आपत्ति जनाएका छन्। उनका अनुसार, भौतिक पूर्वाधार तथा यातायात मन्त्रालयले सामान्य कामलाई बहाना बनाएर पार्टीको महाधिवेशन हुने समयमै सडक रोक्न खोजिएको छ।
सरकारले मंसिर २४ (बुधबार) देखि पुस १ गतेसम्म बिहान १०:३० बजेदेखि दिउँसो ३:३० बजेसम्म यातायात आवागमन रोक्ने तयारी गरेको छ। पोखरेभिर क्षेत्रमा जोखिम कम गर्न र सडक चौडाइ बढाउने प्रक्रियाका लागि आवश्यक देखाइएको भए पनि बस्नेतले यसलाई सामान्य योजना नभई राजनीतिक प्रतिशोधको रुपमा व्याख्या गरेका छन्।
बस्नेत भन्छन्—“महाधिवेशन मंसिर २७–२९ मा छ। ठीक त्यही अवधिलाई लक्षित गरेर सडक बन्द घोषणा गर्नु संयोग मात्रै हो भन्न मिल्दैन। सरकारले कुलमान घिसिङको नेतृत्वमा यस्तो निर्णय गरेर राजनीतिक पूर्वाग्रह देखाएको छ। यस्तो कार्य प्रतिशोधपूर्ण राजनीति बाहेक केही होइन।”
उनले सो निर्णय फिर्ता गरी काम पुसको पहिलो हप्तादेखि सुरु गर्न सरकारलाई आग्रह समेत गरेका छन्। नागढुंगा–मुग्लिन सडक योजना कार्यालयका अनुसार पोखरेभिर क्षेत्रमा अत्यधिक संकुचित भू–भाग कटान गर्नुपर्ने भएकाले सीमित समयका लागि पूर्ण रूपमा डाइभर्सन आवश्यक भएको हो।
योजना कार्यालयले सार्वजनिक गरेको सूचनामा डाइभर्सन अवधि यसप्रकार छः
-
मंसिर २४ देखि पुस १ गतेसम्म
-
बिहान १०:३० — दिउँसो ३:३०
त्यस अवधिमा यात्री तथा सवारी साधनलाई वैकल्पिक मार्ग उपयोग गर्न अनुरोध गरिएको छ। काठमाडौंबाट नौबिसे जाने सवारी साधनहरू नागढुंगा चेकपोस्टमै रोक्ने व्यवस्था मिलाइएको छ। अत्यावश्यक सेवाका सवारी—एम्बुलेन्स, दमकल, सुरक्षा निकायका वाहन तथा शववाहनलाई ट्राफिक प्रहरीले समन्वय गरी मार्ग खुला गराइनेछ। मुग्लिङतर्फबाट आउने सवारी भने खानीखोला, जुंगेखोला, गल्छी–गजुरी खण्डका विभिन्न स्थानहरूमा थुनेर चरणबद्ध रूपमा सञ्चालन गरिनेछ।
वैकल्पिक रूपमा यी मार्ग प्रयोग गर्न सकिनेछः
-
सीतापाईला–भिमढुंगा
-
रामकोट–धार्के सडक
-
सामाखुसी–टोखा–छहरे मार्ग
योजनाका अनुसार सडक विस्तार र कटान कार्यलाई निर्धारण गरिएको समयमा सकिने दाबी गरिएको छ।
