इलिमिनेटरमा काठमाडौं गोर्खाजविरुद्ध चार विकेटको प्रभावशाली जित हासिल गर्दै लुम्बिनी लायन्स नेपाल प्रिमियर लिग (एनपीएल) को दोस्रो क्वालिफायरमा प्रवेश गरेको छ। यस जितसँगै लुम्बिनी भोलि विराटनगर किंग्ससँग उप–फाइनलको टिकटका लागि भिड्ने भएको छ। हारसँगै काठमाडौंको यात्रा यसै चरणमा टुंगिएको छ।
बुधबार कीर्तिपुरस्थित TU क्रिकेट मैदानमा काठमाडौंले प्रस्तुत गरेको ११२ रनको लक्ष्य लुम्बिनीले १७.४ ओभरमा ६ विकेटको क्षतिमा पूरा गर्यो। लुम्बिनीका ओपनर डी’एर्सी शर्टे ३४ बलमा ३३ रन, सन्दीप जोराले २३ रन, कप्तान रोहितकुमार पौडेलले १८ रन थप्दै जितको आधार तयार पारे। काठमाडौंका सन्तोष यादवले दुई विकेट लिँदा सन्नी पटेल, साहब आलम, करण केसी र राशिद खानले एक–एक विकेट लिए।
यसअघि टस जितेर ब्याटिङमा आएका काठमाडौंले १९.१ ओभरमा सबै विकेट गुमाउँदै १११ रन मात्र जोड्यो। टोलीका सन्तोष यादवले २२ रन, आदील आलम र जोन सिम्पसनले समान १८–१८ रन, भीम सार्कीले १४ रन बनाए। पावरप्लेमा नै २९–४ को अवस्थाबाट उबेलिन नसक्दा काठमाडौं दबाबमा परेको थियो।
लुम्बिनीका स्पिनर शेर मल्लले उत्कृष्ट बलिङ गर्दै ४ ओभरमा २२ रन खर्चेर ३ विकेट लिए। कप्तान रोहित पौडेलले पनि ३ विकेट निकाल्दा रुबेन ट्रम्पेलमनले २ विकेट हात पारे। अभिशेष गौतमले एक विकेट जोडे। एनपीएल इतिहासमै दुवै टिम पहिलोपटक प्लेअफमा प्रवेश गरेका थिए। लिग चरणमा काठमाडौं १० अंकसहित तेस्रो र लुम्बिनी ८ अंकसहित चौथो स्थानमा थिए।
अब लुम्बिनी लायन्स र विराटनगर किंग्सबीच भोलि दोस्रो क्वालिफायरमा कडा प्रतिस्पर्धा हुनेछ। उक्त खेलको विजेताले शनिबार (मंसिर २७) फाइनलमा सुदूरपश्चिम रोयल्ससँग उपाधि–लक्ष्य भिडन्त गर्नेछ।
