जर्मनीको स्टाडेमा गोलीकाण्ड, ६ जनाको मृत्यु
जर्मनीको उत्तरी सहर स्टाडेमा सोमबार भएको गोलीकाण्डमा ६ जनाको मृत्यु भएपछि देशभर शोक छाएको छ। प्रारम्भिक अनुसन्धानले घटनाको मुख्य कारण तीन महिनाकी छोरीको अभिरक्षासम्बन्धी विवाद रहेको देखाएको छ। प्रहरीले ४५ वर्षीय एक जर्मन नागरिकलाई मुख्य शंकास्पदका रूपमा नियन्त्रणमा लिएको छ।
मृत्यु हुने सबै जना आमाबाबु तथा साना बालबालिकालाई अस्थायी आश्रय दिने केन्द्रका कर्मचारी रहेको प्रहरीले जनाएको छ। उनीहरूमध्ये चार महिला र दुई पुरुष छन्। घटनामा केही अन्य व्यक्ति घाइते भएका छन्, तर उनीहरूको संख्या सार्वजनिक गरिएको छैन।
प्रहरीका अनुसार शंकास्पद व्यक्ति आफ्नी छोरीसँग सम्बन्धित भेटघाटका लागि उक्त केन्द्र पुगेका थिए। त्यसक्रममा उनले अचानक गोली चलाएको प्रारम्भिक अनुसन्धानबाट खुलेको छ। उनकी तीन महिनाकी छोरी र बालिकाकी आमा भने सुरक्षित रहेका छन्।
घटनापछि भाग्ने क्रममा उनलाई कारमा लैजाँदै गरेकी एक महिलासहित प्रहरीले नियन्त्रणमा लिएको हो। अनुसन्धानकर्ताले ती महिला शंकास्पद व्यक्तिका आफन्त वा चिनजानको व्यक्ति हुन सक्ने बताएका छन्। यद्यपि मुख्य अभियुक्तविरुद्ध औपचारिक पक्राउ पुर्जी जारी गर्ने विषय अनुसन्धानको प्रगतिपछि तय हुने जनाइएको छ।
राजनीतिक वा आतङ्ककारी उद्देश्य नदेखिएको प्रहरीको भनाइ
प्रहरीले हालसम्मको अनुसन्धानमा घटनामा कुनै राजनीतिक, धार्मिक वा आर्थिक उद्देश्य नदेखिएको स्पष्ट पारेको छ। यो व्यक्तिगत पारिवारिक विवादबाट उत्पन्न भएको हिंसात्मक घटना भएको उनीहरूको निष्कर्ष छ।
लोअर स्याक्सोनी राज्यकी आन्तरिक मन्त्री डानिएला बेरेन्सले यसलाई “अत्यन्त निर्मम हिंसात्मक घटना” भन्दै पीडित परिवारप्रति समवेदना व्यक्त गरेकी छन्।
विद्यालय र डे–केयर नजिकै भयो घटना
गोलीकाण्ड भएको स्थान नजिकै बाल हेरचाह केन्द्र र प्राथमिक विद्यालय पनि रहेका छन्। स्थानीय प्रशासनले त्यहाँ रहेका सबै बालबालिका र कर्मचारी सुरक्षित रहेको जनाएको छ।
घटनापछि ठूलो संख्यामा प्रहरी, एम्बुलेन्स र आपत्कालीन उद्धार टोली परिचालन गरिएको थियो। केही समय क्षेत्रलाई सुरक्षा घेरामा राखिए पनि अहिले सर्वसाधारणका लागि कुनै खतरा नरहेको प्रहरीले जनाएको छ। साथै सामाजिक सञ्जालमा फैलिएका अपुष्ट सूचना र अफवाहमा विश्वास नगर्न नागरिकलाई आग्रह गरिएको छ।
राष्ट्रपति र चान्सलरको दुःख व्यक्त
जर्मनीका राष्ट्रपति फ्राङ्क–वाल्टर स्टाइनमायरले सुरक्षा र संरक्षणका लागि स्थापना गरिएको स्थानमै यस्तो हिंसा हुनु अत्यन्त दुःखद भएको बताएका छन्। चान्सलर फ्रिडरिख मर्जले पनि घटनालाई “हृदयविदारक” भन्दै मृतकका परिवारप्रति समवेदना व्यक्त गरेका छन्।
जर्मनीमा बन्दुकसम्बन्धी कानुन युरोपकै कडा मानिन्छ। त्यसका बाबजुद पनि कहिलेकाहीँ यस्ता सामूहिक गोलीकाण्ड हुने गरेका छन्। स्टाडेको यो घटना पछिल्ला वर्षहरूकै सबैभन्दा घातक घटनामध्ये एकका रूपमा हेरिएको छ।
