राष्ट्रिय स्वतन्त्र पार्टी (रास्वपा) का संस्थापक तात्कालीन महामन्त्री डा. मुकुल ढकालले पार्टीको प्रथम ऐतिहासिक महाधिवेशनमा आफूलाई निम्तो नआएको भन्दै असन्तुष्टि व्यक्त गरेका छन्। रास्वपाको पाँचौँ स्थापना दिवस तथा प्रथम महाधिवेशन सुरु भएको अवसरमा सामाजिक सञ्जालमार्फत धारणा सार्वजनिक गर्दै ढकालले पार्टी स्थापनादेखिको संघर्षपूर्ण यात्राको स्मरण गरेका छन्।
‘ठीक चार वर्षअघि आजकै दिन हामीले राष्ट्रिय स्वतन्त्र पार्टी गठन गरेका थियौँ। पार्टी दर्ताका लागि आवश्यक ५०० वटा नागरिकता जुटाउनसमेत संघर्ष गर्नुपरेको त्यो अवस्थाबाट छोटो समयमै पार्टी दुई तिहाइ जनमतसहित सरकारमा पुगेको छ,’ उनले लेखेका छन्। उनले संघर्षका ती दिनहरू इतिहासमा लेखिए वा नलेखिए पनि त्यसलाई प्रत्यक्ष रूपमा भोगेकाहरूको मानसपटलमा सधैँ जीवन्त रहने बताएका छन्।
महाधिवेशनबारे टिप्पणी गर्दै उनले पार्टी स्थापना गर्ने व्यक्ति नै निम्तो सूचीमा नपर्नु विडम्बनापूर्ण भएको बताएका छन्।
‘आज पार्टीले आफ्नो प्रथम ऐतिहासिक महाधिवेशन गर्दैछ। विडम्बना, पार्टीलाई “Fuc*” लेख्ने व्यक्ति प्रधानमन्त्री बनिसक्दा, पार्टी स्थापना गर्ने म भने महाधिवेशनको निम्तो सूचीमा समेत परिनँ,’ उनले लेखेका छन्।
ढकालले आफू चितवनमा उपस्थित नभए पनि त्यसलाई ठूलो विषय नमान्न आग्रह गरेका छन्। ‘मेरो भौतिक शरीर आज चितवनमा छैन। भएको भए पनि करिब ४००० प्रतिनिधिहरूमध्ये एक जना प्रतिनिधि थपिन्थ्यो मात्र,’ उनले भनेका छन्।
उनले राजनीति गर्ने व्यक्तिका लागि भौतिक उपस्थितिभन्दा विचार, मूल्य र सिद्धान्तको उपस्थिति महत्वपूर्ण हुने उल्लेख गरेका छन्। ‘यदि मेरो त्यही एक मत नहुँदा पार्टीले सही दिशा निर्धारण गर्न नसक्ने हो भने, म आज त्यहाँ नभएकोमा दुःखी हुने थिएँ। तर यदि महाधिवेशनले सही कार्यदिशा, सही विचार र सही निर्णय गर्छ भने, मेरो मत पनि त्यही निर्णयमा रहने थियो,’ उनले लेखेका छन्।
ढकालले महाधिवेशनमा सहभागी प्रतिनिधिहरूलाई पार्टीको भावी दिशामा केन्द्रित हुन आग्रह गरेका छन्। ‘आज महत्वपूर्ण कुरा म उपस्थित छु कि छैन भन्ने होइन। महत्वपूर्ण कुरा महाधिवेशनले के निर्णय गर्छ भन्ने हो,’ उनले भनेका छन्।
उनले महाधिवेशन केवल पद बाँडफाँड वा व्यक्ति चयनको कार्यक्रममा सीमित नहुने अपेक्षा व्यक्त गर्दै विचार र सिद्धान्तलाई केन्द्रमा राख्न आग्रह गरेका छन्।
‘को कुन पदमा जित्यो वा हार्यो भन्नेभन्दा ठूलो प्रश्न पार्टीले कुन दिशा रोज्छ भन्ने हो। पद वा व्यक्तिमा सीमित हुनु राजनीति होइन, “राजव्यक्ति” गर्नु हो। राजनीति भनेको राज्य सञ्चालनका नीति, सिद्धान्त, विचार र कार्यदिशामाथिको बहस हो,’ ढकालले लेखेका छन्। प्रतिनिधिहरूलाई सम्बोधन गर्दै उनले ‘व्यक्तिभन्दा विचारलाई, गुटभन्दा संस्थालाई, र पदभन्दा उद्देश्यलाई माथि राखेर निर्णय गर्न’ आग्रह गरेका छन्।
‘“राजव्यक्ति” नगर्नुहोस्, “राजनीति” गर्नुहोस्। महाधिवेशनले सही कार्यदिशा, सही विचार र सही निर्णय गरोस्। सबैमा धेरै शुभकामना, विश्वास र सम्झना,’ उनले शुभकामना दिएका छन्।
