जेन–जी आन्दोलनमा फरार भएका थुनुवा बलात्कार आरोपमा पक्राउ
जेन–जी आन्दोलनका क्रममा प्रहरी हिरासतबाट फरार भएका एक व्यक्ति रामेछापमा ६१ वर्षीया महिलामाथि जबरजस्ती करणी गरेको आरोपमा पक्राउ परेका छन्। पक्राउपछि अनुसन्धान अघि बढाउँदा उनी यसअघि चोरी मुद्दामा हिरासतमा रहेका बेला भागेको खुलेको प्रहरीले जनाएको छ।
प्रहरीका अनुसार पक्राउ पर्ने व्यक्ति प्रेम बिसुञ्जे हुन्। उनीमाथि भदौ २ गते अपराह्न करिब साढे ४ बजे ६१ वर्षीया महिलामाथि जबरजस्ती करणी गरेको आरोप छ। घटनापछि फरार रहेका उनको खोजीका लागि प्रहरीले अनुसन्धान तथा खोजतलास अघि बढाएको थियो।
खोजीका क्रममा भदौ ३ गते दिउँसो करिब २ बजे रामेछाप नगरपालिका–४ स्थित तिलबारीमा लुकिछिपी बसेको अवस्थामा बिसुञ्जेलाई फेला पारेर पक्राउ गरिएको प्रहरीले जनाएको छ।
पक्राउपछि उनलाई रामेछाप जिल्ला अदालतमा उपस्थित गराइएको थियो। अदालतबाट म्याद थप गरी जबरजस्ती करणीसम्बन्धी आरोपमा अनुसन्धान अघि बढाइएको छ।
अनुसन्धानकै क्रममा बिसुञ्जेको विगतको अर्को मुद्दासँग जोडिएको विवरणसमेत खुलेको प्रहरीको भनाइ छ। प्रहरीका अनुसार उनी चोरी मुद्दाको अनुसन्धानका क्रममा सुनसरीस्थित इलाका प्रहरी कार्यालय पकलीको हिरासतमा थिए।
२०८२ भदौ २४ गते भएको जेन–जी आन्दोलनका बेला उत्पन्न परिस्थितिको मौका पारेर उनी हिरासत कक्षबाट भागेका थिए। त्यसयता फरार रहेका उनी झन्डै एक वर्षपछि रामेछापमा अर्को गम्भीर कसुरको आरोपमा पक्राउ परेका हुन्।
प्रहरीले हाल उनीमाथि लागेको जबरजस्ती करणीसम्बन्धी आरोपमा अदालतबाट प्राप्त म्यादभित्र थप अनुसन्धान गरिरहेको जनाएको छ।
