बाढी प्रभावित बालबालिकाका फोटो–भिडियो पोस्ट नगर्न आग्रह
विपद्को बेला उद्धार, राहत र सहयोग जति महत्वपूर्ण हुन्छ, पीडित बालबालिकाको गोपनीयता र मर्यादा जोगाउनु पनि उत्तिकै संवेदनशील विषय हो। राष्ट्रिय बाल अधिकार परिषद्ले भोटेकोशी हुँदै त्रिशुली नदीमा आएको विनाशकारी बाढीबाट पीडित तथा प्रभावित बालबालिकाका फोटो र भिडियो सार्वजनिक नगर्न व्यक्ति तथा संस्थालाई आग्रह गरेको छ।
परिषद्ले विज्ञप्ति जारी गर्दै बाढी प्रभावित बालबालिकाको उद्धार, राहत, सहयोग वा अन्य सेवा उपलब्ध गराउने क्रममा खिचिएका फोटो तथा भिडियो सामाजिक सञ्जाल र सञ्चार माध्यममा पोस्ट नगर्न तथा नगराउन भनेको हो।
विशेषगरी विपद्बाट प्रभावित बालबालिकाको अवस्था देखाउने नाममा उनीहरूको पहिचान खुल्ने वा गोपनीयता र मर्यादामा असर पर्ने सामग्री सार्वजनिक हुन सक्ने विषयमा परिषद्ले सरोकारवालाको ध्यानाकर्षण गराएको छ।
फेसबुक, मेसेन्जर, युट्युब, टिकटक, इन्स्टाग्राम, लिंक्डइन, थ्रेड्स, स्न्यापच्याट, भाइबर, ह्वाट्सएप र एक्सलगायत सामाजिक सञ्जालसँगै सञ्चार माध्यममा समेत त्यस्ता फोटो तथा भिडियो प्रकाशन वा प्रसारण नगर्न परिषद्को अपिल छ।
भदौ १० गते भोटेकोशी हुँदै त्रिशुली नदीमा आएको विनाशकारी बाढीपछि प्रभावित क्षेत्रमा उद्धार, राहत तथा सहयोगका गतिविधि भइरहेका बेला परिषद्ले यस्तो आग्रह गरेको हो।
विपद्मा परेका बालबालिकाको पीडा वा असहाय अवस्थालाई सार्वजनिक सामग्रीका रूपमा प्रयोग गर्नुको सट्टा उनीहरूको गोपनीयता, सम्मान र मर्यादालाई प्राथमिकतामा राख्नुपर्ने परिषद्को सन्देश छ। उद्धार तथा सहयोगमा संलग्न व्यक्ति र संस्थाले समेत यस विषयमा संवेदनशीलता अपनाउन परिषद्ले आग्रह गरेको छ।
