विश्वकप २०२६: मेसीको छैटौं विश्वकप यात्रा सुरु
साबिक विश्वविजेता अर्जेन्टिनाले फिफा विश्वकप २०२६ का लागि २६ सदस्यीय अन्तिम टोली सार्वजनिक गरेको छ। मुख्य प्रशिक्षक लियोनेल स्कालोनीले घोषणा गरेको टोलीको नेतृत्व कप्तान लियोनेल मेसीले गर्नेछन्।
३८ वर्षीय मेसीले कतारमा भएको २०२२ विश्वकपमा अर्जेन्टिनालाई उपाधि दिलाउन महत्वपूर्ण भूमिका खेलेका थिए। हालै इन्टर मियामीबाट खेल्दा बायाँ ह्यामस्ट्रिङमा असहजता देखिए पनि उनी विश्वकप टोलीमा परेका छन्।
उत्तर अमेरिका (अमेरिका, क्यानडा र मेक्सिको) मा हुने प्रतियोगिताअघि अर्जेन्टिनाले होन्डुरस र आइसल्यान्डसँग मैत्रीपूर्ण खेल खेल्ने तालिका छ।
समूह चरणमा अल्जेरिया, अस्ट्रिया र जोर्डनसँग प्रतिस्पर्धा
अर्जेन्टिना समूह ‘जे’ मा रहेको छ। टोलीले जुन १६ मा अल्जेरियाविरुद्ध खेल्दै विश्वकप अभियान सुरु गर्नेछ। त्यसपछि अस्ट्रिया र जोर्डनसँग प्रतिस्पर्धा गर्ने तालिका छ।
लगातार दोस्रो विश्वकप उपाधि जित्ने लक्ष्यसहित मैदानमा उत्रने अर्जेन्टिनालाई प्रतियोगिताको प्रमुख दाबेदारमध्ये एक मानिएको छ।
अर्जेन्टिनाको २६ सदस्यीय टोली
- गोलरक्षक: एमिलियानो मार्टिनेज, जेरोनिमो रुल्ली, हुआन मुसो
- डिफेन्डर: लियान्द्रो बालेर्दी, निकोलास टालियाफिको, गोन्जालो मोन्टिएल, लिसान्द्रो मार्टिनेज, क्रिस्टियन रोमेरो, निकोलास ओटामेन्डी, फाकुन्डो मेडिना, नाहुएल मोलिना
- मिडफिल्डर: लियान्द्रो पारेडेस, रोड्रिगो डे पाउल, भ्यालेन्टिन बार्को, जियोभानी लो सेल्सो, एक्सेक्विएल पालासियोस, एलेक्सिस म्याक एलिस्टर, एन्जो फर्नान्डेज
- फरवार्ड: जुलियन अल्भारेज, लियोनेल मेसी, निकोलास गोन्जालेज, थियागो आल्माडा, जुलियानो सिमेओने, निको पाज, जोसे म्यानुएल लोपेज, लाउटारो मार्टिनेज
विश्वकप इतिहासमा सबैभन्दा धेरै खेल खेल्ने खेलाडीको कीर्तिमान बनाइसकेका मेसीका लागि यो लगातार छैटौं विश्वकप हुनेछ। अर्जेन्टिनाले यसपटक पनि अनुभवी खेलाडी र युवा प्रतिभाको मिश्रणसहित उपाधि रक्षा गर्ने प्रयास गर्नेछ।
