बंगलादेशमा फैलिएको दादुरा संकट झन् भयावह बन्दै गएको छ। मार्च १५, २०२६ यता दादुरा वा दादुरा-जस्तै लक्षणका कारण मृत्यु हुने बालबालिकाको संख्या ५२८ पुगेको छ। सरकारी तथ्यांकअनुसार पछिल्लो २४ घण्टामा मात्रै थप १६ बालबालिकाको मृत्यु दर्ता भएको छ।
हालसम्म देशभर ६३ हजारभन्दा बढी शंकास्पद संक्रमणका घटना रिपोर्ट भएका छन् भने ८ हजार ५०० भन्दा बढी केस प्रयोगशाला परीक्षणबाट पुष्टि भइसकेका छन्। संक्रमण ५८ जिल्लामा फैलिएको बताइएको छ। पाँच वर्षमुनिका बालबालिका सबैभन्दा बढी प्रभावित भएका छन्।
सबैभन्दा बढी असर ढाका डिभिजनमा परेको छ, जहाँ मात्रै २२४ बालबालिकाले ज्यान गुमाइसकेका छन्। स्वास्थ्य अधिकारीहरूका अनुसार संक्रमण तीव्र गतिमा फैलिरहेकाले अस्पतालहरूमा बिरामीको चाप बढ्दो छ।
पछिल्लो २४ घण्टामा मात्रै १ हजार ४३४ नयाँ केस थपिएका छन्। हालसम्म ६३ हजार ८१३ बालबालिकामा दादुरासँग मिल्ने लक्षण देखिएको छ भने ५० हजारभन्दा बढी अस्पतालमा भर्ना भएका छन्। ४६ हजारभन्दा धेरै बालबालिका उपचारपछि घर फर्किसकेका छन्।
सरकारी विवरणअनुसार मृत्यु भएका ५२८ मध्ये ४४२ बालबालिकामा दादुरा-जस्तै लक्षण देखिएको थियो भने ८६ जनामा मेडिकल परीक्षणबाट दादुरा पुष्टि भएको थियो। परीक्षण किट अभावका कारण धेरै संक्रमण समयमै पुष्टि गर्न नसकिएको बताइएको छ।
पाँच वर्षमुनिका बालबालिका सबैभन्दा बढी प्रभावित
दादुराले विशेषगरी पाँच वर्षभन्दा कम उमेरका बालबालिकालाई बढी असर गरिरहेको छ। चिकित्सकहरूका अनुसार निमोनिया, मस्तिष्क सुन्निने समस्या र गम्भीर श्वासप्रश्वास जटिलताका कारण धेरै बालबालिकाको अवस्था बिग्रिएको हो। कुपोषित र खोप नलगाएका बालबालिकामा जोखिम झन् बढी देखिएको छ।
ढाकासहित विभिन्न सहरका अस्पतालमा छुट्टै दादुरा वार्ड सञ्चालन गरिए पनि आईसीयू बेड अभावका कारण उपचार व्यवस्थापन कठिन बन्दै गएको छ।
सरकारको खोप अभियान तीव्र
द्रुत रूपमा फैलिएको संक्रमण रोक्न बंगलादेश सरकारले देशव्यापी खोप अभियानलाई तीव्र बनाएको छ। स्वास्थ्य मन्त्रालयका अनुसार हालसम्म १ करोड ८४ लाखभन्दा बढी बालबालिकालाई दादुराविरुद्धको खोप लगाइसकिएको छ। यो संख्या सुरुआती सरकारी लक्ष्यभन्दा पनि बढी हो।
युनिसेफले कमजोर खोप पहुँच, बाल कुपोषण र कम स्तनपान दरलाई संक्रमण फैलिनुको मुख्य कारण मानेको छ। अन्तर्राष्ट्रिय स्वास्थ्य निकायहरूले पनि बंगलादेशको अवस्थालाई गम्भीर सार्वजनिक स्वास्थ्य संकटका रूपमा हेरिरहेका छन्।
