देशभर भारी वर्षाको चेतावनी, बाढीपहिरोको उच्च जोखिम
मनसुन थप सक्रिय भएसँगै आइतबार देशका अधिकांश भूभागमा वर्षा हुने र केही स्थानमा अति भारी वर्षासमेत हुन सक्ने पूर्वानुमान गरिएको छ। निरन्तर तथा तीव्र वर्षाका कारण बाढी, पहिरो, डुबान र कटानको जोखिम बढेकाले सर्वसाधारणलाई विशेष सतर्कता अपनाउन मौसमविद् तथा विपद् व्यवस्थापन निकायले आग्रह गरेका छन्।
जल तथा मौसम पूर्वानुमान महाशाखाका अनुसार मनसुनको न्यूनचापीय रेखा पश्चिमतर्फ औसत स्थानभन्दा केही उत्तर, नेपालको तराई आसपास पुगेको छ। पूर्वी क्षेत्रमा भने यो रेखा औसत स्थानकै आसपास छ। यही प्रणालीको प्रभावले देशभर बादल लागेको छ।
हाल कोशी, बागमती, गण्डकी र लुम्बिनी प्रदेशका केही स्थानमा हल्कादेखि मध्यम वर्षा भइरहेको छ। कर्णाली प्रदेशका एक–दुई स्थानमा पनि वर्षा मापन गरिएको छ।
महाशाखाले दिउँसो देशभर अधिकांश बदली रहने जनाएको छ। हिमाली क्षेत्रका धेरै स्थान तथा पहाडी क्षेत्रका अधिकांश स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। तराईका धेरै स्थानमा पनि वर्षा हुने अनुमान गरिएको छ। उच्च हिमाली भूभागमा वर्षासँगै हिमपात हुन सक्ने पूर्वानुमान छ।
कोशी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थानमा भारीदेखि धेरै भारी वर्षा हुन सक्छ। बागमती र गण्डकी प्रदेशका केही स्थान तथा मधेश, बागमती र गण्डकी प्रदेशका तराईका एक–दुई स्थानमा पनि भारी वर्षाको सम्भावना रहेको महाशाखाले जनाएको छ।
कोशी, गण्डकी, लुम्बिनी र सुदूरपश्चिम प्रदेशका पहाडी तथा तराई क्षेत्रका एक–दुई स्थानमा अति भारी वर्षासमेत हुन सक्ने चेतावनी दिइएको छ।
राति पनि मौसममा उल्लेख्य सुधार नआउने देखिएको छ। देशभर अधिकांश बदली रहने र हिमाली क्षेत्रका केही स्थानमा मेघगर्जन तथा चट्याङसहित मध्यम वर्षा हुने अनुमान छ। उच्च हिमाली क्षेत्रमा हिमपातको सम्भावना पनि कायमै रहनेछ।
कोशी र सुदूरपश्चिम प्रदेशका पहाडी भूभागका अधिकांश स्थानमा वर्षा हुन सक्छ। बागमती, गण्डकी, लुम्बिनी र कर्णाली प्रदेशका पहाडी भूभागका धेरै स्थान तथा तराईका अधिकांश स्थानमा पनि मेघगर्जन र चट्याङसहित हल्कादेखि मध्यम वर्षाको सम्भावना छ।
रातिको समयमा कोशी, गण्डकी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थानमा भारीदेखि धेरै भारी वर्षा हुन सक्ने महाशाखाको अनुमान छ। मधेश र बागमती प्रदेशका पहाडी तथा तराई क्षेत्रका एक–दुई स्थानमा भारी वर्षा हुन सक्छ। कोशी र सुदूरपश्चिम प्रदेशका केही स्थानमा भने अति भारी वर्षाको जोखिम रहेको छ।
अत्यधिक वर्षा हुने क्षेत्रमा साना नदी तथा खोलामा पानीको सतह अचानक बढ्न सक्ने, पहाडी भूभागमा पहिरो तथा गेग्रान बहाव आउन सक्ने र तराई तथा सहरी क्षेत्रमा डुबानको समस्या देखिन सक्ने जोखिम छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि आकस्मिक बाढी, पहिरो, डुबान, कटान र गेग्रान बहावको सम्भावनालाई ध्यानमा राख्दै जोखिमयुक्त क्षेत्रमा बसोबास गर्ने नागरिकलाई सतर्क रहन आग्रह गरेको छ। नदी तथा खोला किनार, भिरालो जमिन र पहिरोको जोखिम भएका सडकमा यात्रा गर्दा विशेष सावधानी अपनाउन भनिएको छ।
