जबरजस्ती करणीका फरार प्रतिवादी ओमनबाट पक्राउ, नेपाल ल्याइए
जबरजस्ती करणी र विद्युतीय कारोबार ऐनसम्बन्धी कसुरमा फरार रहेका झापाका एक प्रतिवादीलाई इन्टरपोलको रेड नोटिसका आधारमा ओमनबाट पक्राउ गरी नेपाल ल्याइएको छ।
नेपाल प्रहरीका अनुसार पक्राउ पर्नेमा झापाको बिर्तामोड नगरपालिका–३ स्थायी घर भएका बिमल राजवंशी छन्। उनीविरुद्धको मुद्दामा लामो समयदेखि खोजी भइरहेको अवस्थामा अन्तर्राष्ट्रिय तहमा समेत पक्राउ प्रक्रिया अघि बढाइएको थियो।
राजवंशीलाई खोजतलास र पक्राउ गर्न नेपाल प्रहरी प्रधान कार्यालयअन्तर्गत अपराध अनुसन्धान विभागको इन्टरपोल शाखाले इन्टरपोल महासचिवालयलाई अनुरोध गरेको थियो। सोही अनुरोधपछि २०२६ मे १३ मा उनीविरुद्ध रेड नोटिस जारी भएको थियो।
त्यसपछि एनसीबी काठमाडौं र एनसीबी मस्कटबीच भएको समन्वयमा राजवंशी ओमनमा पक्राउ परेका हुन्। पक्राउपछि उनलाई नेपाल ल्याउन एनसीबी काठमाडौंबाट प्रहरी टोली खटाइएको थियो।
प्रहरी टोलीले कतार एयरवेजमार्फत राजवंशीलाई नेपाल ल्याएको हो। उनी शनिबार साँझ ४ बजेर २९ मिनेटमा नेपाल आइपुगेका थिए।
अन्तर्राष्ट्रिय समन्वयमार्फत फरार प्रतिवादीलाई स्वदेश फर्काइएसँगै अब उनीमाथिको अनुसन्धान र कानुनी प्रक्रिया नेपालमै अघि बढ्नेछ। प्रहरीले घटनासम्बन्धी थप अनुसन्धान भइरहेको जनाएको छ।
