काठमाडौंमा ग्यास अभाव: जुनसुकै कम्पनीको सिलिन्डर साट्न पाइने
बाढीपछि आपूर्ति शृङ्खलामा देखिएको अवरोधका कारण काठमाडौं उपत्यकामा एलपी ग्यास पाउन केही कठिनाइ हुन थालेपछि सरकारले तत्कालका लागि वैकल्पिक व्यवस्था अघि बढाउने भएको छ। उपभोक्तासँग रहेको कम्पनीको सिलिन्डरअनुसार ग्यास नपाइने अवस्था आए अर्को कम्पनीको सिलिन्डरसँग उही मूल्यमा साटेर ग्यास उपलब्ध गराउने व्यवस्था मिलाउन निर्देशन दिइएको हो।
उद्योग, वाणिज्य तथा आपूर्तिमन्त्री गौरीकुमारी यादवले यस्तो व्यवस्था काठमाडौं उपत्यकाभित्र लागू गर्न नेपाल आयल निगम र सम्बन्धित ग्यास उद्योगहरूलाई निर्देशन दिनुभएको छ।
नयाँ व्यवस्थाअनुसार कुनै उपभोक्ताले प्रयोग गर्दै आएको कम्पनीको ग्यास सिलिन्डर बजारमा तत्काल उपलब्ध नभए त्यसैको प्रतीक्षामा बसिरहनुपर्ने छैन। उपलब्ध अर्को कम्पनीको सिलिन्डरसँग साटेर उही मूल्यमा ग्यास लिन सकिने व्यवस्था मिलाइनेछ।
हालैको बाढीले आपूर्ति प्रणाली प्रभावित बनाएपछि उपत्यकामा ग्यास वितरण केही असहज बनेको छ। त्यसबाट दैनिक उपभोगमा पर्ने असर कम गर्न र उपभोक्ताले ग्यासका लागि अनावश्यक समस्या भोग्न नपरोस् भनेर सरकारले कम्पनीबीच सिलिन्डर साटासाटको विकल्प अघि सारेको हो।
मन्त्री यादवले निर्णयलाई कागजमै सीमित नराखी उपत्यकामा प्रभावकारी रूपमा कार्यान्वयन गर्न सम्बन्धित निकायलाई निर्देशन दिनुभएको छ। विशेष गरी आपूर्ति असहज भएको अवस्थाको फाइदा उठाएर उपभोक्तालाई दुःख दिने वा कृत्रिम अभाव सिर्जना गर्ने गतिविधिप्रति कडाइ गरिने सरकारी चेतावनी छ।
सरकारले तोकेको व्यवस्थाविपरीत काम भएको पाइए प्रचलित कानुनअनुसार कारबाही गरिने मन्त्री यादवले स्पष्ट पार्नुभएको छ।
यो व्यवस्था काठमाडौं उपत्यकाका लागि मात्रै लागू हुने गरी अघि बढाइएको हो। बाढीका कारण सिर्जित तत्कालको आपूर्ति समस्या सहज बनाउँदै उपभोक्तासम्म ग्यासको पहुँच कायम राख्नु यसको मुख्य उद्देश्य रहेको छ।
