संसददेखि सगरमाथासम्म : मिङ्मा डेभिड शेर्पाको ऐतिहासिक आरोहण
राष्ट्रिय स्वतन्त्र पार्टीका प्रतिनिधिसभा सदस्य मिङ्मा डेभिड शेर्पाले संघीय संसदको लोगो बोकेर सगरमाथाको सफल आरोहण गरेका छन्। बुधबार बिहान ५ः४० बजे उनले विश्वको सर्वोच्च शिखर सगरमाथा टेक्न सफल भएका हुन्।
शेर्पाले ‘फ्रम हाउस टु द पिक’ भन्ने नारासहित यो अभियान पूरा गरेका हुन्। संसददेखि विश्वकै अग्लो शिखरसम्मको यात्रालाई उनले प्रतीकात्मक रूपमा प्रस्तुत गरेका छन्।
सगरमाथा आरोहण पूरा गरेर आधार शिविर फर्किएपछि उनले सामाजिक सञ्जाल फेसबुकमार्फत आफ्नो सफलताको जानकारी दिएका थिए। नौ दिनको अभियानपछि आफूले सफलतापूर्वक शिखर चुमेको उनले उल्लेख गरेका छन्।
नेपालको संसदको लोगो बोकेर सगरमाथा पुग्नु केवल व्यक्तिगत उपलब्धि मात्र नभई राष्ट्रिय पहिचानसँग जोडिएको सन्देश पनि भएको धेरैले टिप्पणी गरेका छन्। शेर्पा लामो समयदेखि पर्वतारोहण क्षेत्रमा सक्रिय रहँदै आएका व्यक्तित्व हुन्।
आरोहण सफल भएपछि उनले सभामुख डोलप्रसाद अर्यालसहित अभियानमा सहयोग गर्ने सबैप्रति आभार व्यक्त गरेका छन्। कठिन मौसम र चुनौतीपूर्ण परिस्थितिका बीच सफल आरोहण पूरा भएको उनले बताएका छन्।
सगरमाथा आरोहणको यो समाचार सामाजिक सञ्जालमा पनि निकै चर्चामा आएको छ। धेरैले सांसद शेर्पालाई बधाई दिँदै नेपालको पहिचान विश्वसामु थप उचो बनाएको प्रतिक्रिया जनाइरहेका छन्।
