नेपालको भूमि र राष्ट्रिय स्वाभिमानसँग जोडिएको विषयमा प्रधानमन्त्रीको अभिव्यक्तिलाई लिएर प्रतिनिधिसभामा फेरि विवाद चर्किएको छ। नेपाली कांग्रेसका सचेतक निश्कल राईले प्रधानमन्त्रीले नेपाललाई नै ‘सीमा अतिक्रमणकारी’ देशका रूपमा प्रस्तुत गर्न खोजेको आरोप लगाउँदै संसद्मा आएर सार्वजनिक रूपमा आत्मालोचना गर्नुपर्ने माग गरेका छन्।
प्रतिनिधिसभाको बैठकमा आकस्मिक समय लिएर बोल्दै राईले नेपालले छिमेकी भारतको कुनै भूभाग नमिचेको दाबी गरे। उनका अनुसार नेपालको अन्तर्राष्ट्रिय छवि र राष्ट्रिय सम्मानमा चोट पुग्ने खालका अभिव्यक्ति जिम्मेवार पदमा रहेका व्यक्तिबाट आउनु गम्भीर विषय हो।
राईले प्रधानमन्त्रीका समर्थकहरूले सामाजिक सञ्जालमा विभिन्न सामग्री र दाबीहरू प्रस्तुत गर्दै नेपालले भारतको भूमि अतिक्रमण गरेको भन्ने धारणा बनाउन खोजेको आरोप पनि लगाए। यस्तो प्रयासले राष्ट्रको प्रतिष्ठामाथि नै प्रश्न उठाउने अवस्था सिर्जना भएको उनको भनाइ थियो।
‘प्रधानमन्त्रीले सदनमै स्पष्टिकरण दिनुपर्छ’
कांग्रेसले केही दिनदेखि लगातार यही विषय उठाइरहेको उल्लेख गर्दै राईले प्रधानमन्त्री स्वयं संसद्मा उपस्थित भएर आफ्नो भनाइबारे स्पष्टिकरण दिनुपर्ने बताए। उनले राष्ट्रिय हितविपरीत गएको अभिव्यक्तिका लागि माफी माग्न पनि आग्रह गरे।
उनले सभामुखप्रति पनि असन्तुष्टि जनाए। विवादित अभिव्यक्ति संसद्को अभिलेखबाट हटाउन वा त्यसबारे आवश्यक निर्देशन दिनुपर्ने अपेक्षा भए पनि त्यस्तो कदम नचालिएको भन्दै उनले सभामुखबाट स्पष्ट रुलिङको माग गरे।
राईले सीमा सुरक्षाका लागि ज्यान गुमाएका सहिदहरूको सम्मानसँग समेत यो विषय जोडिएको उल्लेख गर्दै राष्ट्रिय स्वाभिमानमाथि कुनै पनि प्रकारको सम्झौता स्वीकार्य नहुने बताए।
यो विवाद प्रधानमन्त्रीले जेठ १७ गते प्रतिनिधिसभामा सांसदहरूको प्रश्नको जवाफ दिने क्रममा नेपालले पनि भारतको केही भूमि उपयोग गरेको आशयको टिप्पणी गरेपछि सुरु भएको हो। त्यसयता विपक्षी दलहरूले उक्त अभिव्यक्तिलाई लिएर निरन्तर आपत्ति जनाउँदै आएका छन्।
