भोजपुरमा २४४ किलो गाँजासहित १९ वर्षीय युवक पक्राउ
Read this article also in :
English
भोजपुरको हतुवागढी गाउँपालिकास्थित धिरिङ खोलाको बगरबाट ठूलो परिमाणको गाँजासहित १९ वर्षीय युवक पक्राउ परेका छन्। प्रहरीले उनको साथबाट ६ बोरामा राखिएको २४४.७७० किलोग्राम गाँजा बरामद गरेको हो।
पक्राउ पर्नेमा भोजपुरकै आमचोक गाउँपालिका–७ का १९ वर्षीय एकराज मगर रहेका छन्। उनलाई असोज २० गते बिहान करिब ३:३० बजे हतुवागढी गाउँपालिका–९ स्थित धिरिङ खोलाको बगरबाट नियन्त्रणमा लिइएको हो।
प्रहरीले मगरसँगै को.प्र.०१–०२–०४६ प ८६५१ नम्बरको मोटरसाइकल र एउटा मोबाइल फोनसमेत नियन्त्रणमा लिएको छ।
एकैपटक ठूलो परिमाणमा गाँजा फेला परेपछि यसको ओसारपसार कहाँबाट र कहाँसम्म गर्न लागिएको थियो भन्ने विषयसमेत अनुसन्धानको दायरामा परेको छ। यद्यपि, यसबारे थप विवरण सार्वजनिक गरिएको छैन।
बरामद गाँजा तथा पक्राउ परेका युवकका सम्बन्धमा प्रहरीले थप अनुसन्धान अघि बढाएको जनाएको छ।
