सिंहदरबारमा दलहरूले सोधे– सरकार कहाँ छ ?
सुनसरीमा विकसित पछिल्लो तनावपूर्ण अवस्थालाई लिएर प्रमुख राजनीतिक दलहरूले सरकारको सक्रियता र समन्वय क्षमतामाथि प्रश्न उठाउँदै तत्काल सर्वदलीय संवादको पहल गर्न आग्रह गरेका छन्। राष्ट्रिय स्वतन्त्र पार्टी (रास्वपा)का सभापति रवि लामिछानेको आह्वानमा बुधबार सिंहदरबारमा बसेको सर्वदलीय बैठकमा सहभागी नेताहरूले संवेदनशील परिस्थितिमा सरकार नेतृत्वदायी भूमिकामा देखिनुपर्नेमा जोड दिएका हुन्।
बैठकपछि सञ्चारकर्मीसँग कुरा गर्दै नेपाली कांग्रेसका सभापति गगनकुमार थापाले संकटका बेला सरकारको उपस्थिति केवल सुरक्षा व्यवस्थामा सीमित हुन नहुने बताए। उनका अनुसार यस्ता परिस्थितिमा सरकारले राजनीतिक दल, प्रदेश र स्थानीय तहसँग समन्वय गर्दै साझा पहलको वातावरण निर्माण गर्नुपर्ने हुन्छ।
थापाले प्रधानमन्त्रीले तत्काल सर्वदलीय बैठक बोलाएर सबै राजनीतिक शक्तिलाई एउटै मञ्चमा ल्याउनुपर्ने धारणा राखे। उनले राष्ट्रपतिसँग समेत परामर्श गरी सामाजिक सद्भाव कायम राख्ने साझा प्रयास अघि बढाउन आवश्यक रहेको बताए। उनका अनुसार धार्मिक सहिष्णुता र सामाजिक सद्भाव नेपाली समाजको महत्वपूर्ण आधार भएकाले त्यसको संरक्षणमा सबै दलको साझा जिम्मेवारी रहन्छ।
कांग्रेसले स्थानीय तहसम्म पनि सर्वदलीय छलफलको वातावरण बनाउन सहयोग गर्न तयार रहेको जानकारी बैठकमा गराएको थापाले बताए। सरकारबाट औपचारिक पहल नआए पनि रास्वपाले प्रमुख दलहरूलाई छलफलका लागि एकै ठाउँमा बोलाएको कदमलाई उनले सकारात्मक माने।
उता नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले पनि अहिलेको अवस्थालाई राजनीतिक प्रतिस्पर्धाभन्दा राष्ट्रिय जिम्मेवारीका रूपमा लिनुपर्ने बताएका छन्। बैठकमा उनले प्रधानमन्त्रीले सबै राजनीतिक दललाई विश्वासमा लिएर संवाद र सहमतिमार्फत समाधान खोज्न अग्रसर हुनुपर्ने धारणा राखेका थिए।
प्रचण्डले विगतमा भूकम्प, बाढी–पहिरो जस्ता विपद् र संविधान निर्माणका जटिल चरणमा राजनीतिक दलहरूले देखाएको सहकार्यको उदाहरण स्मरण गर्दै अहिले पनि त्यही परिपक्वता आवश्यक रहेको उल्लेख गरे। उनले बल प्रयोगबाट दीर्घकालीन समाधान सम्भव नहुने भन्दै संवाद, सहमति र राजनीतिक समझदारीलाई प्राथमिकता दिन आग्रह गरे।
उनले घटनाको निष्पक्ष छानबिन गरी दोषीमाथि कानुनी कारबाही हुनुपर्ने माग पनि राखे। साथै, स्थानीय समुदायसँगै बाह्य रूपमा वातावरण भड्काउने प्रयास हुन सक्ने सम्भावनाप्रति सतर्क रहन सबै पक्षलाई आग्रह गरे।
बैठकमा सहभागी नेताहरूले सामाजिक सद्भाव, धार्मिक सहिष्णुता र सार्वजनिक विश्वास जोगाउने विषयलाई साझा प्राथमिकताका रूपमा उठाएका थिए। उनीहरूको निष्कर्षमा वर्तमान परिस्थितिमा सरकार, राजनीतिक दल र सरोकारवाला सबै पक्षबीच निरन्तर संवाद र समन्वय अपरिहार्य रहेको उल्लेख गरिएको छ।
बैठक जारी रहेकै बेला कांग्रेस सभापति थापा भने पार्टीका वरिष्ठ नेता तथा पूर्वउपप्रधानमन्त्री गोपालमान श्रेष्ठको निधनपछि आयोजित श्रद्धाञ्जली कार्यक्रममा सहभागी हुन बाहिरिएका थिए। बैठकमा कांग्रेस संसदीय दलका नेता भीष्मराज आङ्दाम्बे लगायत अन्य प्रमुख दलका प्रतिनिधिहरूको पनि सहभागिता रहेको थियो।
