अन्तर्राष्ट्रिय स्तरमा नेपाली खानाको पहिचान स्थापित गरेका चर्चित सेफ सन्तोष कुमार साह ठगी तथा बैंकिङ कसुर सम्बन्धी मुद्दामा पक्राउ परेका छन्। काठमाडौं जिल्ला अदालतबाट जारी पक्राउ अनुमति अनुसार प्रहरीले उनलाई धनुषाको जनकपुरबाट नियन्त्रणमा लिएको हो।
काठमाडौं उपत्यका अपराध अनुसन्धान कार्यालयका अनुसार गैरीधारास्थित एक रेस्टुरेन्ट खरिदसँग सम्बन्धित आर्थिक विवादपछि उनीविरुद्ध उजुरी परेको थियो। उजुरीमा रेस्टुरेन्ट खरिदका क्रममा सहमति अनुसारको सम्पूर्ण रकम भुक्तानी नगरेको आरोप लगाइएको छ।
प्रहरीले शुक्रबार राति जनकपुर उपमहानगरपालिका–८ रामानन्द चोकबाट साहलाई पक्राउ गरेको जनाएको छ। सोही प्रकरणमा संलग्न रहेको आरोपमा सिरहाका नारायण साह सुडी पनि पक्राउ परेका छन्।
प्रारम्भिक जानकारी अनुसार रेस्टुरेन्ट खरिद मूल्य करिब एक करोड ३० लाख रुपैयाँ रहेको र त्यसको केही रकम बाँकी राखिएको दाबी उजुरीकर्ताको छ। यही विषयलाई लिएर ठगी र बैंकिङ कसुर सम्बन्धी अनुसन्धान अघि बढाइएको प्रहरीले जनाएको छ।
पक्राउ परेका दुवै जनालाई थप अनुसन्धानका लागि काठमाडौं जिल्ला प्रहरी परिसर भद्रकाली पठाइएको छ। सार्वजनिक बिदाका कारण अदालतमा उपस्थित गराउने प्रक्रिया सोमबार अघि बढ्ने प्रहरी स्रोतले जनाएको छ।
विश्वमञ्चमा नेपाली स्वाद चिनाएका सेफ
सिरहाको कर्जन्हामा जन्मिएका सन्तोष साह नेपाली खानालाई अन्तर्राष्ट्रिय स्तरमा चिनाउने व्यक्तित्वका रूपमा परिचित छन्। बेलायतमा आयोजित चर्चित पाककला प्रतिस्पर्धा मास्टरशेफ: द प्रोफेशनल्स मा उनी सन् २०२० मा पहिलो रनरअप बनेका थिए। त्यसपछि सन् २०२१ मा भएको विशेष संस्करण मास्टरशेफ: द प्रोफेशनल्स रिम्याच जितेपछि उनको चर्चा अझ व्यापक बनेको थियो।
उनको पक्राउसँगै अहिले सामाजिक सञ्जालदेखि पाककला क्षेत्रमा समेत व्यापक चर्चा सुरु भएको छ। यद्यपि उनीमाथि लागेको आरोपबारे अन्तिम निष्कर्ष अदालतको प्रक्रिया र अनुसन्धानपछि मात्रै स्पष्ट हुने छ।
