जीबी राई र चोलेन्द्रबारे के भन्छ सरकार ? सस्मित पोखरेलले दिए जवाफ
सहकारी ठगी प्रकरणमा जोडिएका जीबी राईको खोजी र अनुसन्धान जारी रहेको सरकारले जनाएको छ। राई कहाँ छन् भन्नेबारे सरकारसँग स्पष्ट जानकारी नरहेको बताउँदै सरकारका प्रवक्ता तथा शिक्षा तथा खेलकुदमन्त्री सस्मित पोखरेलले प्रहरीले उनीसम्बन्धी अनुसन्धान गरिरहेको बताएका हुन्।
मंगलबार बसेको मन्त्रिपरिषद् बैठकपछि सञ्चारकर्मीसँग कुरा गर्दै पोखरेलले राईको अवस्थिति आफूलाई जानकारी नभएको बताए। तर त्यसले प्रहरीको अनुसन्धान रोकिएको अर्थ नलाग्ने उनको भनाइ थियो।
‘उहाँ जुन ठाउँमा हुनुहुन्छ, त्यो ठाउँ थाहा भएन। तर प्रहरीले उहाँको बारेमा अनुसन्धान गरेकै छ,’ पोखरेलले भने।
सहकारी ठगी प्रकरणमा राईको विषय लामो समयदेखि सार्वजनिक चासोमा रहँदै आएको छ। यस्तो अवस्थामा उनको अवस्थिति र अनुसन्धानको प्रगतिबारे सरकारका प्रवक्तासमक्ष प्रश्न उठेको हो।
यसैबीच, पूर्वप्रधानन्यायाधीश चोलेन्द्र शमशेर जबरालाई प्रहरीले नियन्त्रणमा लिएको विषयमा पनि सरकारले फरक व्याख्या प्रस्तुत गरेको छ। सरकारका अनुसार जबरालाई पक्राउ गरिएको नभई सुरक्षाको अवस्था उत्पन्न भएपछि सुरक्षित स्थानमा लगिएको हो।
मन्त्रिपरिषद् बैठकपछि यसबारे सोधिएको प्रश्नमा प्रवक्ता पोखरेलले जबरालाई पक्राउ वा नियन्त्रणमा लिइएको भन्ने विवरण अस्वीकार गरे। जबराको सुरक्षामाथि प्रश्न उठेपछि प्रहरीले ‘रेस्क्यु’ गरी सुरक्षित स्थानमा पुर्याएको उनको भनाइ थियो।
काठमाडौं उपत्यका अपराध अनुसन्धान कार्यालयले शनिबार राति महाराजगञ्जस्थित निवासबाट जबरालाई लगेको थियो। त्यसपछि आइतबार दिउँसो उनलाई छाडिएको थियो। यही घटनालाई लिएर उनी पक्राउ परेका हुन् वा सुरक्षाका लागि लगिएको हो भन्ने प्रश्न उठेको थियो।
पोखरेलले जबराको परिवारबाट थप सुरक्षा माग गर्दै प्रहरी कार्यालयमा निवेदन दिइएको तथ्यलाई सरकारको भनाइ पुष्टि गर्ने आधारका रूपमा प्रस्तुत गरे।
‘उहाँलाई पक्राउ गरिएको होइन भन्ने कुरा प्रस्ट भइसकेको छ। पक्राउ गरिएको, नियन्त्रणमा लिइएको होइन,’ पोखरेलले भने, ‘उहाँको सुरक्षामा प्रश्न आइसकेपछि सुरक्षा प्रदान गर्नका लागि रेस्क्यु गरेर लगिएको हो।’
उनका अनुसार पछि परिवारले नै थप सुरक्षाको माग गर्दै निवेदन दिएपछि घटनाको प्रकृतिबारे थप स्पष्ट भएको छ।
सरकारले जबरालाई पक्राउ नगरिएको दाबी गरे पनि शनिबार राति उनलाई घरबाट प्रहरीले लगेको र भोलिपल्ट छाडिएको घटनाले सार्वजनिक रूपमा उठेका प्रश्न भने कायमै राखेको छ। सरकारको पछिल्लो स्पष्टीकरणले उक्त घटनालाई कानुनी नियन्त्रणभन्दा सुरक्षा व्यवस्थापनका रूपमा प्रस्तुत गरेको छ।
एकैपटक सार्वजनिक चासोका दुई फरक विषयमा जवाफ दिएको सरकारले जीबी राईको हकमा प्रहरी अनुसन्धान जारी रहेको र जबराको हकमा भएको प्रहरी परिचालन सुरक्षासँग सम्बन्धित रहेको बताएको छ।
