कांग्रेस महाधिवेशन : आज उम्मेदवारी दर्ता, ७११४ मतदाता
नेपाली कांग्रेसको १५औँ महाधिवेशन नयाँ नेतृत्व चयनको निर्णायक चरणमा प्रवेश गरेको छ। महाधिवेशनअन्तर्गत नयाँ केन्द्रीय कार्यसमितिका लागि मंगलबार उम्मेदवारी दर्ता हुँदैछ भने देशभरबाट आएका ७ हजार ११४ महाधिवेशन प्रतिनिधिले नेतृत्व चयनमा मताधिकार प्रयोग गर्नेछन्।
उम्मेदवारी दर्ताका लागि केन्द्रीय निर्वाचन समितिले काठमाडौंको राष्ट्रिय सभागृहमा कार्यालय स्थापना गरेको छ। सभागृहको भित्री पर्खालमा महाधिवेशन प्रतिनिधिको नामावलीसमेत टाँसिएको छ।
निर्वाचन समितिका सदस्यसचिव राजु कटुवालका अनुसार बिहान १० बजेपछि उम्मेदवारी फारम वितरण सुरु गरिएको छ। उम्मेदवारले सभागृहभित्रै तोकिएको शुल्क बुझाएर फारम लिन सक्ने व्यवस्था मिलाइएको छ।
महाधिवेशन प्रतिनिधिको सार्वजनिक नामावलीमा ७ हजार ११४ जनाको नाम समावेश छ। यही प्रतिनिधिमण्डलले कांग्रेसको आगामी केन्द्रीय नेतृत्व चयन गर्नेछ।
यसपटकको महाधिवेशन नेतृत्व परिवर्तनमा मात्रै सीमित छैन। कांग्रेसले आफ्नो सांगठनिक संरचनामै ठूलो विस्तार गरेको छ। सोमबार पारित संशोधित विधानअनुसार यसअघि १६७ सदस्यीय रहेको केन्द्रीय कार्यसमिति बढाएर २९७ सदस्यीय बनाइएको छ। पदाधिकारीको संख्या पनि उल्लेख्य रूपमा बढाइएको छ।
नयाँ संरचनामा वरिष्ठ उपसभापतिको पद थपिएको छ भने उपसभापतिको संख्या चार पुर्याइएको छ। उपसभापतिमध्ये एक महिला अनिवार्य हुने व्यवस्था गरिएको छ। महामन्त्री तीन जना रहने र त्यसमध्ये पनि कम्तीमा एक महिला हुनुपर्ने व्यवस्था छ।
प्रवक्ताको पदलाई समेत नयाँ संरचनामा समेटिएको छ। पार्टीको केन्द्रीय संरचना विस्तारसँगै विभिन्न समुदाय, क्षेत्र, महिला र युवा प्रतिनिधित्वलाई फराकिलो बनाउने व्यवस्था विधानमा गरिएको छ।
१४औँ महाधिवेशनबाट बनेको कांग्रेस केन्द्रीय कार्यसमिति १६७ सदस्यीय थियो। १५औँ महाधिवेशनसम्म आइपुग्दा प्रतिनिधिको संख्या र समावेशी सहभागिताको दायरा बढेको भन्दै पार्टीले केन्द्रीय संरचना पनि विस्तार गरेको हो।
महाधिवेशनको निर्वाचन कार्यक्रम अघि बढेसँगै अब कांग्रेसभित्रको ध्यान उम्मेदवारी र नेतृत्व चयनतर्फ केन्द्रित भएको छ। मनोनयन प्रक्रिया पूरा भएपछि उम्मेदवारको अन्तिम सूची तय हुनेछ र त्यसपछि मतदानमार्फत आगामी कार्यकालका लागि नयाँ केन्द्रीय नेतृत्व चयन हुनेछ।
